Fitore e jashtëzakonshme e realizuar në frymën e fundit ndaj FC Drita [1-0]. Armend Thaqi edhe njëherë tjetër e shënoi emrin e tij në historikun e përballjes ndërmjet rivalëve të qytetit.
Ndeshja nisi me shumë ritëm dhe iniciativë nga ana e futbollistëve të Ardian Nuhiu, të cilët golin e zhbllokimit kanë mundur ta gjejnë qysh në minutën e 21-të të ndeshjes, teksa Armend Thaqi godet traversën nga ndërprerja.
Rast të mirë shënimi pati edhe Sabit Bilali pesë minuta më pas, mirëpo goditjen e tij brenda zonës e priti portieri Faton Maloku.
Deri në fundin e pjesës së parë, mundësi e mirë shënimi u tregua edhe për Besir Ramadanin, por goditja e mbrojtësit përfundoi mbi traversë.
Fraksioni i dytë i lojës nisi gjithashtu me iniciativën e skuadrës së “kuqe”, mirëpo rastin e parë serioz e patën mysafirët. Arb Manaj brenda zonës goditi shtyllën pingule nga afërsia. Ndodhi kjo në minutën e 65-të të ndeshjes.
Rast tejet të mirë shënimi pati Oltion Bilalli në minutën e 83-të të ndeshjes, por gjuajtja e tij u ndal sërish nga Faton Maloku. Anësori i gjilanasve u asistua bukur nga Blerind Morina brenda zonës dhe goditi bukur, mirëpo sërish pa sukses.
Goli i shumëpritur erdhi në minutën e 86-të të ndeshjes, derisa Armend Thaqi gjuajti bukur nga jashtëzonës me këmbën e majtë dhe qëlloi në këndin e ‘gardianit’ Maloku për ta zhbllokuar më në fund ndeshjen [1-0].
Festë në shkallët e stadiumit dhe në stolin e ekipit të cilët festuan së bashku me kryetrajnerin Nuhiu këtë gol, i cili në fund doli të jetë edhe goli i fitores.
Në vazhdimin e ndeshjes nuk pati ndonjë rast për t’u veçuar me ekipin që shënon një fitore tejet të rëndësishëm në rrugëtimin drejt objektivave.
Në kuadër të xhiros së 18-të, njëherit edhe e fundit për këtë gjysmësezone, skuadra udhëton për t’u ballafaquar me Ferizajn.
SC Gjilani 1:0 FC Drita
Golashënues: Armend Thaqi 86′ [1-0]
Të ndëshkuar: Marko Roganovic, Robert Rrahmani, Oltion Bilalli, Besir Ramadani, Kenan Haxhihamza
Gjyqtarë: Ilir Mehmeti, Fatlum Berisha, Fatlum Jashari, Mentor Ajeti, Lirim Jashari (VAR), Faton Jakupi (aVAR)
Stadiumi ndihmës në Gjilan
Përbërja: Haxhihamza, Thaqi, Roganovic, Ramadani, Ibrahimi, Shabani, Bilali (80′ Morina), Rrahmani (87′ Jamal), Bilalli, Prapashtica (69′ Edi Basa), Jarovic. Kryetrajner: Ardian Nuhiu.