Nis me barazim edicioni 25/26 për të besuarit e Ardian Nuhiut, të cilët lënë fitoren që të ikën nga duart në duel me Ballkanin pas avantazhit në pjesën e parë të lojës.
- Almir Aganspahic realizon golin e parë sezonal për kuqebardhët
- Debutojnë Vokli Laroshi, Mevlan Adili, Astrit Thaqi, Lorik Boshnjaku, Mehdi Çoba dhe Ennur Totre
- “Skifterat” japin mesazhin e një sezoni drithërues dhe mbështetës për futbollistët
- Nderohet Abdulla Syla për kontributin 30 vjeçar në klub
- Sfida e radhës përballë Dukagjinit në Klinë
Ekipi mori një barazim në sfidën e parë kampionale për edicionin 2025/26 në Albi Mall Superligë, derisa ndau pikët me Ballkanin. Almir Aganspahic realizoi në pjesën e parë të lojës në minutën e 29-të, derisa Marsel Ismajlgeci barazoi në minutën e 65-të të ndeshjes.
Edi Basa kishte fatin e ndeshjes në këmbët e tij, derisa shpërdoroi dy mundësi të arta shënimi pranë epërsisë fillestare të vendasve. Të parën e shpërdoroi në minutën e fundit të pjesës së parë, derisa qëlloi traversën nga afërsia, ndërkohë të dytën në minutën e 48-të, derisa goditi sërish tërdhorëzën i vetëm me ‘gardianin’ Artan Iljazi.
Sabit Bilali ishte një tjetër emër i përmendur, derisa në minutën e 70-të të ndeshjes pati mundësinë ta ndryshonte rezultatin, por goditjen e tij e priti portieri udhëtues.
Ekipi u përshëndet në fund nga tifozët për ndeshjen e bukur të treguar, pavarësisht rezultatin që nuk ishte ai i cili u kërkua.
Të dhënat:
SC Gjilani – FC Ballkani 1-1 (1-0)
Stadiumi ndihmës në Gjilan
Gjyqtar: Genc Nuza, Fatlum Berisha, Bujar Selimaj, Bardh Ajeti, Burim Jahmurataj (VAR), Gëzim Mehmeti (AVAR)
Golashënues: Almir Aganspahic 29′ | Marsel Ismajlgeci 65′
Përbërja: Laroshi, Thaqi (C), Adili, Krivanjeva (80′ Astrit Thaqi), Ibrahimi, Boshnjaku, Bilali (80′ Totre), Rrahmani (85′ Morina), Prapashtica (68′ Çoba), Basa, Aganspahic (68′ Jarovic). Trajner: Ardian Nuhiu
Të ndëshkuar: Mevlan Adili, Sabit Bilali