Ekipi ka shfrytëzuar maksimalisht ditët e fundit të javës për t’u përgatitur sa më mirë për përballjen e rëndësishme të së dielës ndaj Ferizajt.
Pas humbjes së mesjavës kundër Malishevës, stafi teknik është fokusuar në rikthimin e ritmit dhe vetëbesimit të skuadrës, duke punuar intensivisht si në aspektin fizik ashtu edhe në atë taktik.
Një lajm pozitiv për ekipin është rikthimi i Hamdi Namanit nga lëndimi, i cili pritet të jetë një përforcim i rëndësishëm për formacionin. Në anën tjetër, mungesa e Sabit Bilalit për shkak të kartonëve paraqet një sfidë shtesë për trajnerin në përzgjedhjen e formacionit startues.
Ndeshja do të zhvillohet të dielën në stadiumin ndihmës në Gjilan, me fillim nga ora 15:00, ku pritet një përballje e fortë dhe mjaft interesante mes dy ekipeve.